In Iscanu

Sos de Bore Manunta

Cantigos - Poesias - Cultura

HOME
Bore Manunta

Bore Manunta est naschidu in Iscanu su deghe de Abrile 1879 e in ie est mortu su vintibattoro de Austu 1934.

Haiat una buttega in sa cale bendìat dogni ispetzia de merce. A costas de sa buttega bi teniat unu tzilleri atobiu de poetes e cantadores. Possediat puru una prensa pubblica impreada a produìre s'ozu ermanu.

Amantiosu de poesia, cantigos e musica sarda, est istadu su prus antigu sonadore de organette in ballos, festas e carrasegares de sa 'idda nostra. Su chi hazis a bier in fattu a custas paraulas est s'organette sou, su primmu ch'est lompidu a Iscanu a coa de sos ultimos annos de su 1800. Sa marca est Paolo Soprani e d'est istadu fattu in Castelfidardo in ue fuit sa primma frabica de custos istrumentos. Sa cassia est tota in linna cun sos tastos e sos buttones in madreperla. Est unu traste chi a dies de oe hat prus de 120 annos.

Organette de Bore Manunta

A parte s'organette no possedimos peruna registrazione de musica o ballos e niuna atera cosa chi nos ammentet puru sa bella 'oghe chi teniat Bore Manunta.

Pro sa poesia nos abbarrat solu una littera chi li haiat imbiadu in risposta su poete Pedru Canu. In custa mandat sos saludos e sos augurios a su poete e cantadore de palcu Tzitzu Rosa, una de sas colunnas de su Parnasu Iscanesu.

A BORE MANUNTA

Caru Manunta ti prego una cosa
giughe custa littera manu manu
raccumandados dae Pedru Canu
sos saludos li dasa a Tzitzu Rosa.

Cussa testa bramada e pretziosa
chi est appretziada in dogni festa
cussa bramada e pretziosa testa
chi est in dogni festa appretziada
cussa testa pretziosa e bramada
tue gia l‘ischis ca presente l‘hasa.

Caru Manunta ti prego una cosa
giughe custa littera manu manu
raccumandados dae Pedru Canu
a Tzitzu Rosa sos saludos li dasa.

Si podes oe no bistes a crasa
a s‘eroe a li giugher sas lodes
no bistes a crasa si oe podes
a li giugher sas lodes a s‘eroe
no bistes a crasa si podes oe
chi l‘atzettat che vaglia ‘e mill‘iscudos.

Caru Manunta ti prego una cosa
giughe custa littera manu manu
raccumandados dae Pedru Canu
li dasa a Tzitzu Rosa sos saludos.

Cun sa muzere mannos e minudos
sena dannos a sou piaghere
mannos e minudos cun sa muzere
a sou piaghere sena dannos
cun sa muzere minudos e mannos
potat godire salude perfetta.

 

 

De parte mia amabile poeta
retzi sa poesia fatta in arte
amabile poeta ‘e mia parte
retzi sa fatt‘in arte poesia
amabile poeta ‘e parte mia
atzetta custos innos de amore.

 

E tue cantadore ti nde ammentes
torrami sa risposta e no istentes!

 

Caros amigos mios de Iscanu
infines bos saludo totucantos
si Deus cheret chi m‘incontro sanu
gia bos visito a Totu sos Santos
dendenos tando un‘istrinta ‘e manu
sa salude contemus a ispantos.
Totu sos Santos isprichen s‘azudu
adiu a nos bier cun saludu.

Pedru Canu

Sa passione chi haiat Bore Manunta pro sa poesia sarda l'han muntesa e praticada sos fizos Antoni e Zuanne e sos nebodes Zuanne Pedru Angotzi e Antiogu Milia.

Antoni e Zuanne sun bistados bonos improvvisadores in ottavas, connottos in bidda e in fora. Ambos han fintzas imbiadu poesias a taulinu a paritzos cuncursos binchinde premios e retzinde apretzios in medas logos.

Zuanne Pedru Angotzi e Antiogu Milia han leadu parte a cuncursos de poesia in tota sa Sardigna otteninde targas e ammentos, e sighin ancora cun impignu e amore.

 

In Iscanu est faina de Zuanne Pedru Angotzi in ammentu de su jaju Bore Manunta